Quintana asegura en Boiro que a transferencia do salvamento marítimo é a única solución estrutural para evitar catástrofes como a do Prestige
O portavoz nacional do BNG participou nun acto en homenaxe aos bateeiros e mariñeiros que defenderon as rías galegas hai cinco anos
Boiro, 17 Novembro 07. O portavoz nacional do BNG asegurou hoxe en Boiro que Galiza debe autorresponsabilizarse dos seus problemas, e asegurou que o problema do Prestige non se debeu unicamente á incompetencia dos gobernantes senón sobre todo á falta de competencias do goberno autonómico en salvamento marítimo.
Quintana participou nun acto organizado polo BNG en Boiro, co lema “Galiza, dona da súa costa”, así como nunha homenaxe aos bateeiros de Cabo de Cruz que defenderon a ría de Arousa da entrada do fuel do Prestige. Asegurou “ter o convencemento de que as xentes do mar saíron hai cinco anos a defender o seu traballo, pero tamén para defender a Galiza” e comprometeuse a tomar nota das súas ensinanzas para que non se repita.
“Madrid sempre di que non a transferir competencias, pero logo non as executa; a xente non quere que os gobernos miren para outro lado, quere que se responsabilicen do problema, como fixeron hai cinco anos os mariñeiros de Cabo de Cruz”, afirmou.
O vicepresidente do goberno galego destacou a importancia da mar para a nosa economía, con 44.000 persoas traballando no mar e 150.000 no complexo mar-industria. “Para nós é algo estratéxico, pero para o Estado non é prioritario”, asegurou.
“En Galiza, cando falamos de mar, pensamos en lonxas e mexilloeiros, pero en Madrid, cando falan de mar pensan nunha sombrilla na praia. Cando o BNG fala de que as competencias residan en Galiza non só o fai por nacionalismo, que tamén, senón por eficacia e benestar para os cidadáns”, dixo.
No acto, que tivo lugar na Casa da Cultura da Cachada, interviron tamén Francisco Jorquera, senador e candidato ao Congreso pola provincia da Coruña para as próximas eleccións xerais, o alcalde nacionalista de Boiro, Xosé Deira, e a portavoz do BNG en Ribeira, Dominga Brión.
A Voz de Galicia:
Cabo foi escenario dun «acto de xustiza» coas xentes do mar