O Director Xeral de Xuventude comprometeuse a apoiar a gravación dun CD cos grupos noveis do noso concello, tamén colaborará na edición dunha publicación periódica e garantiu apoio económico da Dirección Xeral ao Festival Galle-Rock
Este venres reuníuse, na sede do BNG de Ribeira, Rubén Cela, Director Xeral de Xuventude con representates dos grupos musicais de Ribeira e membros da Asociación Cultural Bastantes Llon. Nesta xuntanza tamén estiveron presentes a portavoz municipal Dominga Brión e o concelleiro Luís Teira.
O motivo desta xuntanza foi expoñer o traballo que leva facendo a Dirección Xeral dentro do proxecto da Rede de Locais de “Nsaio” que se está desenvolvendo en todo o país. Esta rede permite acondicionar unhas instalacións para que os grupos musicais ensaien e graben as súas maquetas. Estas inversións estaas facendo a Vicepresidencia da Xunta en locais que poñen a disposición os concellos.
Unha vez máis o BNG de Ribeira lamenta que o noso concello sexa un dos poucos da comarca que quede sen local de ensaio dentro da Rede “Nsaio” por culpa dun goberno, presidido por Torres Colomer, que se nega a recibir unha inversión que podería chegar aos 150.000 euros.
Os músicos locais, entre outras cuestións, explicaron as razóns das movilizacións que tiveron os pasados días en contra do Rexistro de Grupos musicais que promoveu o Concello de Ribeira.
Máis o motivo fundamental da xuntanza foi a presentación de proxectos, feita polos músicos locais, pola cal solicitaban colaboración da Dirección Xeral de Xuventude. Entre as propostas están:
Gravación dun CD cos grupos noveis do noso concello. En Ribeira hai na actualidade máis de 25 grupos, moitos dos cales non teñen ningún tema gravado nun estudio profesional. Este CD permitirá aos grupos novos poder ter a súa primeira experiencia de gravación.
Este traballo será elaborado integramente por persoas vencelladas a Ribeira, así serán os propios músicos os que fagan dende o deseño gráfico do disco ata ser os propios técnicos de son do mesmo. Será polo tanto unha experiencia autoformativa.
Esta proposta foi moi ben acollida por Rubén Cela, e comprometeu á Dirección Xeral a financiar este interesante proxecto.
Outro dos proxectos aos que se compremeteu a colaborar foi a edición dunha publicación periódica que informe sobre grupos e acontecementos musicais da nosa localidade.
Finalmente Indicar que Rubén Cela, comprometeu apoio económico da Dirección Xeral de Xuventude ao Festival Galle-Rock, xa que este festival conta na súa programación con bandas locais.