O Pleno de Ribeira, reunido en sesión extraordinaria este xoves 9 de febreiro, aprobou por unanimidade iniciar os trámites para municipalizar o aparcadoiro do Centenario, cumprindo así unha demanda histórica defendida polo BNG.
Segundo detallan os informes técnicos e xurídicos a xestión directa por parte do Concello de Ribeira é “máis vantaxosa” e redunda no “beneficio da poboación ribeirense”, avalando as teses defendidas polo BNG. O Concello de Ribeira creará nos vindeiros días unha comisión que estudará as as posibles maneiras de xestionalo que serán expostas aos grupos municipais.
Os concelleiros Luís Pérez Barral e Cruz Rivadulla Márquez mostraron a súa satisfacción asegurando que “o tempo deunos a razón ao se avalar que a xestión pública é máis eficiente”. Neste sentido, o Partido Popular errou cando unilateralmente privatizou a xestión porque provocou un encarecemento dos prezos e supuxo prestar un servizo de peor caliadade.
Pérez Barral destacou que o BNG sempre tivo claro que o aparcadoiro debería servir para aumentar as prazas de estacionamento “que tanta falta fan en Ribeira”. O portavoz nacionalista asegura que agora van seguir traballando para rebaixar as tarifas e se apliquen bonificacións as persoas que merquen no comercio local.
Propostas do Plan Único
A sesión plenaria tamén serviu para aprobar as actuacións que se van realizar grazas ás achegas de 1,4 millóns de euros que concede a Deputación da Coruña mediante o Plan de Obras e Servizos (POS) Plan Único.
Desde o BNG fixemos varias propostas que se inclúen neste plan e que agardamos que poidan ser desenvolvidas con celeridade para que poidan ser unha realidade máis pronto que tarde. Estas actuacións propostas polo Bloque son:
A) A cuberta do parque das Avesadas é unha das vellas demandas feitas polo BNG para que a rapazada poida ter un espazo onde xogar durante todo o ano, independentemente de se hai días de mal tempo. Unha obra por valor de 97.000 euros.
Se falamos de parques cubertos, temos que dicir que solicitamos polo menos dous parques e o anunciado en Carreira segue agardando a súa materialización.
B) A pavimentación da rúa Francisco Lorenzo Mariño coa que mellorar o firme da estrada e garantir a accesibilidade universal nunha das principais estradas de Aguiño por 165.000€.
C) Os vestiarios do campo de fútbol de Oleiros que son unha necesidade urxente para que os usuarios deste espazo deportivo teñan onde poder cambiarse con comodidade. O investimento ascende a 151.000 euros.
Agora ben, botamos en falta a inclusión dalgunha máis das 20 propostas que rexistramos e que foron as seguintes:
Ribeira segue precisando a construción de baños públicos, aumento de zonas verdes e a mellora do barrio do Monumento, por non falar da histórica demanda en Deán da mellora integral da rúa Sidreiras que o PP impide desenvolver desde o ano 2013.
En materia de seguranza viaria críamos importante ampliar e dotar de sumidoiros a rúa Revolta de Castiñeiras, dotar de beirarrúa e pavimentar a rúa Iñeiras en Olveira, a mellora da estrada que vai ao Corgo en Corrubedo e a pavimentación e dotación de servizos na rúa Esteirón e accesos á Corna en Palmeira.
Con respecto á mellora das instalacións deportivas propoñiamos ademais de construír novos vestiarios no campo de fútbol de Oleiros, dotar de torres de iluminación o campo de fútbol de Carreira, mellorar a zona do Campo da Tasca con novo mobiliario así como unha renovación integral da casa da cultura de Aguiño.
Por último e para aumentar os espazos de lecer e zonas verdes no municipio, o BNG propuxo implementar un plan “Reverdecer Ribeira”, no que se contempla a adquisición de terreos para facer unha alameda no centro urbano, cubrir o parques infantil das Avesadas para usar cando chove, construír dous aseos públicos en Ribeira, rehabilitar o lavadoiro de Gude en Artes como espazo de ocio e dotar á zona de Bretal dun parque infantil e zona verde.
Solicitamos que os proxectos de reforma que se fagan nas rúas e estradas do municipio contemplen a plantación de árbores que embelezan o municipio.
Desde o BNG votamos a favor pero reclamamos tamén axilizar as todas as actuacións que aínda aínda agardan desde o ano 2022 por culpa da parálise do seu goberno municipal. “É hora de que a xente de Ribeira e das súas parroquias vexa que as demandas que se fan, teñan resposta” aseverou Pérez Barral.
As actuacións a cargo do Plan Único aprobáronse cos votos a favor de PP, PBBI, BNG, PSOE e abstención de SR. Foron as seguintes:
O Pleno extraordinario tamén deu conta da renuncia de Miguel Ángel Vázquez como concelleiro do PBBI.