O Goberno Central non garante ao BNG que os mariñeiros embarcados poidan votar nas próximas eleccións xerais
Paréceme tremendamente preocupante que na era das novas tecnoloxías se lle impida o exercicio dos seus dereitos a un importante número de cidadáns de Ribeira, da Barbanza e do País. Sen embargo, así é; na práctica, a máis de 10.000 residentes galegos, entre mariñeiros embarcados na flota de altura e gran altura, traballadores da mariña mercante e persoal da Armada, élles negado o exercicio do dereito ao voto.
Francisco Jorquera, senador do BNG, denuncia que “non se trata dun problema técnico, senón de falta de vontade política dos sucesivos Gobernos centrais”.
Jorquera indicou que “noutros casos especiais, como no das tropas españolas despregadas en Afganistán, ou no seu día en Iraque, o Goberno sí que habilitou medidas para que puideran exercer o dereito a voto” polo que subliñou que “non estamos ante un problema de complexidade técnica, senón de falta de vontade política”.
Tamén lembrou a este respeito, que “en países como Suecia, cunha flota máis pequena, si se habilitaron medidas para que os seus cidadáns embarcados poidan exercer o dereito a voto”.