O grupo municipal do Bloque Nacionalista Galego – Asembleas Abertas de Ribeira, quere mostrar, o seu rexeitamento ante a actual falta de transparencia do equipo de goberno deste concello.
A manifestación máis palpábel da opacidade coa que goberna o Partido Popular é o feito de que este grupo municipal – supoñemos que o resto dos grupos da oposición tamén – non recibe as actas da xunta de goberno local desde hai tres meses. Os últimos documentos recibidos foron a primeiros de xuño, concretamente a da XGL do día 4-06-2015.
Como é evidente, estes feitos conculcan o dereito inalienábel dos concelleiros e concelleiras a recibir información da acción de goberno, polo que esiximos o cese desta práctica escurantista e que sexa remitida, en tempo e forma, a documentación que é precisa para o noso traballo democrático de fiscalización e control das accións do goberno local do Concello de Ribeira.
Lembremos que desde as últimas eleccións o goberno de Ribeira conta con só 8 dos 21 concelleiras/os da Corporación Municipal, un feito que fai aínda máis necesaria ca nunca, a necesidade contar coa transparencia a participación de todos os grupos políticos.
Dada gravidade que reviste para nós este feito queremos deixar constancia, e por iso presentamos un escrito, ante o sr. Secretario do que pedimos o seu amparo, o Alcalde, así como ante a sociedade ribeirense para que sexan coñecedores deste feito.