O BNG solicita mellorar o camiño ao río en Axeitos

O Bloque Nacionalista Galego de Ribeira faise eco das peticións que nos trasladan uns veciños e veciñas de Axeitos para que se adecúe un camiño de acceso ao paseo fluvial do río Artes desde a aldea de Axeitos.


Dito camiño, malia estar sinalizado, tan só está pavimentado con cemento nunha parte mentres que a outra está nun estado intransitábel, pois, é unha lameira que recolle a auga que vai da fonte. “A non ser que se vaia con botas de auga, é imposibel achegarse ao río. Se no verán xa é difícil acceder, en tempo de chuvia faise imposíbel” declarou o voceiro do BNG, Xosé Vázquez Cobas.


A veciñanza leva tempo demandando algunha actuación que mellore este camiño pero o goberno local fai oídos xordos ás peticións que se lle fan. Vázquez Cobas recrimina que o Partido Popular esquece as necesidades das parroquias e centra o gasto en cementar o centro urbano ribeirense. “Desde o BNG entendemos que estas pequenas cuestións deberían ser atendidas polo executivo local de maneira prioritaria porque supoñen molestias importantes que padece a veciñanza do rural e que, “con pequenos investimentos e actuacións, se poden solucionar” argumentou.


Por todo iso e tras escoitar a veciñanza de Axeitos, o BNG insta a que se canalice a auga e se estude algunha pequena actuación que permita darlle solución ao problema descrito sen máis demoras no tempo.


Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.