O BNG preocúpase polo gromo Covid da residencia de Ribeira

Coas restricións anunciadas polo propio presidente da Xunta de Galiza, os catros concellos da comarca da Barbanza pasan a estar xa no nivel máximo, dentro dunha área sanitaria, Santiago-Barbanza, das máis afectadas do país nestes momentos e onde tanto o número de casos positivos como o número de persoas hospitalizadas por covid seguen a aumentar.

Neste contexto, após o Nadal soubemos dun primeiro gromo de infección na residencia de maiores Domus Vi de Ribeira, curiosamente unha semana despois de seren vacinadas na propia residencia e de manterse dende o mes de marzo pasado sen ningún contaxio. Alén das persoas contaxiadas coñeciamos a nova desalentadora do falecemento de dúas das persoas residentes que foran trasladadas ao Centro Galego de Desenvolvemento Integral (CEGADI).

Segundo a deputada nacionalista, Rosana Pérez, o centro Domus Vi de Ribeira ten 106 residentes e a día de hoxe, Cos datos da propia Consellería de Política Social, ten o terceiro gromo de covid máis importante en afectación a residentes de toda Galiza. Para Pérez Fernández a situación é “sumamente preocupante dende o punto de vista sanitario”.

Por todo o exposto, a deputada nacionalista rexistrou unha iniciativa parlamentar para que a Xunta de Galiza adopte todas cantas medidas sexan precisas para controlar o gromo de covid-19 producido recentemente na residencia de maiores Domus Vi de Ribeira, incluída a súa intervención. Do mesmo xeito preguntará que causas baralla a Xunta da infección dun importante número de residentes despois de seren vacinados/as, se se están cubrindo as baixas do persoal que está contaxiado e que actuacións pensa desenvolver para pervir novos contaxios.

One Comment on “O BNG preocúpase polo gromo Covid da residencia de Ribeira”

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.