Tras coñecerse unha nova sentenza xudicial sobre as licenzas que outorgou o Goberno ribeirense para instalar unha gasolineira de baixo custo en Xarás, o grupo municipal do Bloque Nacionalista Galego mostrou a súa preocupación ante o que consideran “un novo revés xudicial” que dana a imaxe do Concello de Ribeira e pon en risco fondos municipais así como varios postos de traballo no municipio. “A xestión á hora de tramitar os permisos de instalación da gasolineira en Xarás non puido facerse peor”.
O BNG lamenta que a mala xestión realizada polo Partido Popular no seu día, tanto desde a Xunta como desde o Concello de Ribeira, estea poñendo en risco cartos públicos do Concello de Ribeira se a Xustiza impón o aboamento dunha indemnización por mala praxe. Tamén destacamos que as “presuntas” actuacións irregulares feitas polo Partido Popular poñen en risco os empregos das persoas que actualmente traballan nesa gasolineira porque a sentanza obriga a clausurar as instalacións nun prazo de .
O portavoz nacionalista, Luís Pérez Barral, asegura que o PP manobrou para conceder unha segunda licenza coa que pretenderon solucionar as irregularidades anteriores, cuestión que recrimina o tribunal aclarando de maneira explícita que “a licenza outorgada polo Concello ten a finalidade de eludir o cumprimento do ditame xudicial”.
“Esta nova sentenza demostra que se infrinxiu a lexislación e que as excusas do PP non son válidas”. Barral lembra que até o momento tódalas sentenzas xudiciais foron en contra dos pretextos esgrimidos polo alcalde, situación pola cal lle pide “depurar responsabilidades políticas de maneira inmediata” por danar a imaxe do Concello de Ribeira, facer perigar o sustento de varias familias de traballadoras e os cartos públicos se hai que indemnizar.