O Bloque Nacionalista Galego – Asembleas Abertas viu dous vertedoiros incontrolados nas parroquias de Artes e Aguiño.
Na zona do muíño de Correa (Artes) existe actualmente un pequeno vertedoiro incontrolado no que se atopan electrodomésticos de gran tamaño ciscados pola gabia.
Outro dos vertedoiros incontrolados que o BNG viu foi no lugar de Couso, sito na parroquia de Aguiño. Este punto xa é un habitual das persoas desconsideradas co noso medio natural.
Alén do impacto visual que producen por estar nunha zona pola que discorren os camiñantes e visitantes que vaian pola senda fluvial do río Artes, no primeiro caso e nun merendoiro o segundo, poden supoñer un foco de contaminación importante tanto para a flora como para a fauna.
Polo exposto, o concelleiro Luís Pérez Barral, en nome do BNG-AA solicitará o seguinte:
A) Que o Concello de Ribeira proceda á eliminación deste vertedoiro incontrolado tan pronto como sexa posíbel.
B) Que o Concello de Ribeira continúe traballando na loita contra este tipo de vertedoiros implicando á Policía Local e mellorando a información que ten a poboación sobre o Punto Limpo.
C) Facer unha campaña a través da internet (por medio da páxina web e redes sociais) promovendo o uso do Punto Limpo e explicar o seu funcionamento.