Milleiros de persoas concentráronse na tarde de hoxe na Praza do Obradoiro, en Santiago de Compostela contra o borrador de Decreto do galego presentado hoxe pola Xunta de Galiza, convocadas pola plataforma Queremos Galego.
Non faltou á importante cita unha ampla representación do BNG da Barbanza. Entre eles, a Responsábel Comarcal, Dores Torrado, o alcalde de Boiro, Xosé Deira, concelleiros e concelleiras dos catro concellos da Barbanza ou a Responsábel Comarcal de Acción Municipal e Voceira Municipal en Ribeira, Dominga Brión.
Os milleiros de persoas, procedentes da Barbanza e de todo o país, concentráronse na Praza do Obradorio, xusto enfronte do Pazo de Raxoi que era onde estaba previsto que se celebrara a reunión do Consello da Xunta, como ven sendo habitual. Na tarde de onte Feijoo decidiu pasar o Consello da Xunta a San Caetano, estreando co decretazo a polémica sala remodelada por Touriño na anterior lexislatura. A Feijoo non lle valeu de nada agocharse “Nas Toupeiras”, como lle chaman á zona da nova sala. A multitude de persoas concentradas no Obradoiro percorreron as rúas de Compostela até chegar a San Caetano.
Nin a choiva torrencial, nin unha precipitada convocatoria impediu que as galegas e galegos que nos achegamos até Compostela nos dirixiramos até “As Toupeiras” de San Caetano para que o goberno do PP escoitara a nosa voz, ante este grave atentado ao noso máis importante sinal de identidade, por parte de quen debera protexelo. Esta norma, según todas as previsións, deixará ao noso idioma reducido a tan só un terzo das materias no ensino non universitario, dificultando enormemente que o alumnado remate os seus estudos acadando a competencia lingüística no idioma propio.