Bieito Lobeira considera que a actual fase do proxecto, de estudo das alegacións, é o momento idóneo para negociar aquelas localizacións do Plan que están a xerar máis rechazo
Santiago de Compostela, 8 Outubro 07.- O deputado do BNG Bieito Lobeira apostou hoxe pola creazón dunha Mesa de Diálogo para que todas as partes afectadas polo futuro Plano de Acuicultura teñan a oportunidade de expor as súas posturas.
Lobeira defendeu esta iniciativa como un “instrumento útil” para revisar aqueles puntos e localizacións do proxecto que están a xerar maior oposición e para que así sexa posíbel introducir os cambios pertinentes co maior consenso posíbel.
O deputado salientou que este é o mellor momento en tanto o Plano está na súa fase de estudo das alegacións, que superan o millar –ás que hai que sumar a recollida de sinaturas en contra do actual deseño- e polo tanto aínda é susceptíbel de ser modificado.
O parlamentar lembrou, no debate en comisión dunha iniciativa ao respeito, que non se pode ollar cara outro lado, a oposición existe, dixo, tanto popular como institucional (véxase o concello de Ribeira) contra algúns emprazamentos concretos e por iso considera que cómpre adoptar medidas.
Pola súa parte, o director xeral de Recursos Mariños, Antonio García Elorriaga, defendeu que se trata dun Plano negociado e consensuado dende o principio entre os principais axentes implicados: as diferentes Consellarías e os concellos, non obstante recoñeceu que non está nada pechado mentres as alegacións estean en fase de estudo.
García Elorriaga coincidiu con Lobeira en que se trata compatibilizar o desenvolvemento do sector acuícula, de grande futuro en Galiza, co respeito ao medio ambiente e asegurou que é vontade do goberno galego que o Plan que definitivamente se aprobe –previsiblemante antes de finais de ano, anunciou- cumpra esta premisa.