O BNG de Ribeira ven de presentar unha iniciativa solicitando información relativa á retirada de 4 das 6 bandeiras azuis outorgadas ás praias de Ribeira por falta de socorristas
Tamén reclama que se depuren responsabilidades ante un feito que vai en detrimento da seguridade das nosas praias e da imaxe do noso concello
O BNG leva interesándose, a través de iniciativas ao Pleno do Concello de Ribeira, sobre a mellora das condicións dos recursos naturais e paisaxísticos do noso concello e, máis concretamente, pola mellora de servizos nas praias do noso concello que serven como espazo de lecer e esparcemento para a nosa cidadanía, así como de reclamo turístico.
Durante anos varias das nosas praias tiveron o distintivo da Bandeira Azul como recoñecemento á dotación de servizos (limpeza, baños, duchas, servizo de socorrismo, entre outros) outorgadas pola Asociación de Educación Ambiental e do Consumidor. Este mesmo ano foron 6 as praias que inicialmente obtiveron tal recoñecemento.
En diversos medios de comunicación de onte, 9 de xuño de 2009, afírmase que a entidade que outorga as Bandeiras Azuis, obrigou ao concello á retirada de 4 destas 6 bandeiras (concretamente n’A Corna, Río Azor, Touro e A Ameixida) debido a que non se contaba cos servizos de perceptivos de salvamento. Situación esta que nos parace especialmente grave xa que os usuarios e usuarias das praias que van a unha praia con este distintivo pensan que hai persoal que vela pola súa seguridade.
Iniciativa Municipal:
2009-07-09-situacion-praias-bandeira-azul.pdf