Os máis de 60 colectivos sociais e ecoloxistas afectados polo Plan Acuícola promovido pola Consellería de Pesca presentarán unha Iniciativa Lexislativa Popular (ILP) para protexer o noso litoral das agresións industriais e urbanísticas.
A ILP pretende “evitar a venda do noso litoral, un patrimonio público e un dos nosos sinais de identidade”, impedindo todo tipo de agresións, sinalaron. A súa posta en marcha, non só permitirá que os políticos teñan que escoitar as reivindicacións promulgadas polos colectivos afectados, senón que as propias formacións políticas terán que dar a coñecer a súa posición con respecto ó proxecto acuícola e expresar os seus motivos, tal e como indicou Manoel Santos.
Os colectivos promotores esperan que a ILP sexa aceptada a trámite e aprobada no Parlamento. Polo de agora, o texto atópase en fase de proceso, coa constitución dunha comisión promotora formada por dez membros que se encargará da súa redacción. Unha vez lista, será presentada na Cámara, probablemente en xaneiro. Cando teña o visto e prace, comezarán os catro meses para a recollida de 15.000 sinaturas da cidadanía.
