Arquivos da etiqueta: Pleno

Luces e sombras no pleno, ao remate ameazas

- Aprobado por unanimidade a proposta do BNG para dotar dun acceso seguro o parque do Castro de Castiñeiras: o concelleiro Antón Parada Fernández defendeu unha necesidade que existe en Castiñeiras desde hai anos, mais que agora se agrava ao existir un parque infantil e unhas canchas deportivas na zona do Castro.

O BNG levou unha iniciativa que demandaba a veciñanza da zona como é a mellora da seguridade viaria construíndo unha beirarrúa a carón do porto para darlle acceso a esta área de lecer e tamén darlle altura ao valado das pistas para evitar que os balóns e pelotas escapen para fóra.
Proposta completa

- Proposta do BNG para poder empregar o superávit do concello en obras e servizos para a veciñanza: o voceiro do Bloque Xosé Vázquez Cobas argumentou esta iniciativa na necesidade de darlle resposta ás necesidades das persoas. Neste sentido criticou que o goberno do Partido Popular queira castigar aos concellos que teñen unha economía saneada obrigando á contención do gasto sen importar a situación económica de cada municipio, tratando por igual aos que están economicamente mal como aos que están nunha boa situación. Ribeira terá en 2017 arredor duns 2.200.000€ de superávit que as políticas do PP nos impiden usar e que o BNG quere empregar para satisfacer demandas sociais e mellorar os servizos públicos.
Aprobado cos votos a favor do BNG, PSOE, IPR, e 3 edís non adscritas/os e a abstención de PP e C’s.
Proposta completa

- Proposta para declarar Ribeira libre de circos e espectáculos con animais: A cuestión do respecto cara aos animais levou a que o pobo demande novas accións en diferentes eidos normativos. Este mesmo mes a veciñanza da Barbanza opoñíase á instalación dun circo con animais nas diferentes vilas onde se instalou. En Boiro a pesar da prohibición expresa por parte do concello de instalarse, nunha actitude intolerábel non fixeron caso das indicación e colocaron cartalaría e mesmo quixeron levantar o precinto policial que lle impedía a apertura. O concelleiro Luís Pérez Barral defendeu que aínda que os espectáculos circenses non amosen condutas de violencia explícita á vista do público espectador, os actos que os animais teñen que realizar durante toda a súa vida non son habituais nin naturais e, para obrigalos a se comportaren deste xeito, sométenos a métodos de adestramento baseados no castigo físico, a privación de alimento e ao illamento do resto dos seus conxéneres e en contínuo traslado.

Un importante número de países e vilas de todo o mundo xa vetaron o uso de animais nos circos con base na súa protección e benestar, ao considerar que a súa exhibición e as condicións de vida supoñen unha crueldade, ao mesmo tempo que incrementan o tráfico ilegal de animais e a caza furtiva de especies protexidas. En Galiza máis dun millón de persoas viven en vilas que xa prohiben o uso de animais en circos e espectáculos.

Alén do anteriormente exposto os circos usan os animais como reclamo do público infantil. Desde o Bloque xulgamos que as crianzas, a sociedade do futuro, merecen unha educación baseada en valores que inclúan o respecto cara aos seres vivos e o seu contorno. Neste mesmo sentido, dicir que xa que Ribeira conta cunha canceira, o Concello de Ribeira debería realizar accións dirixidas a promover a adopción dos animais que se atopan nesa instalación.

A pesar destes argumentos, IPR intentou misturar o debate comparando tomar leite ou comer carne co maltrato e o cativerio animal. A proposta foi desvirtuada mediante unha emenda do PP e rexeitouse cos votos de PP, IPR, C’s e 3 edís non adscritas/os, a abstención do PSOE (no ano 2012 apoiara a mesma proposta), ficando o BNG só na súa defensa.
Proposta completa

Condenamos a actitude do edil de IPR Juan Manuel Reiriz por ameazar ao noso compañeiro Luís Pérez Barral:

Desde Iniciativa Progresista de Ribeira (IPR) tentouse misturar o debate comparando o maltrato e o cativerio animal con consumir leite ou carne, algo fóra de todo sentido común e que o concelleiro Luís Pérez Barral cualificou como “argumentos trapalleiros”. Adxectivo que o alcalde obrigaría a retirar por “argumentos faltos de rigor” aducindo que podía ser ofensivo. Para quen non coñeza o significado de trapalleiro, a RAG di que é pouco formal, que fala moito e sen tino.

Unha vez rematado o pleno e xa fóra do concello, o concelleiro de IPR Juan Manuel Reiriz Lampón díxolle ao noso compañeiro Luís Pérez textualmente “se me cheghas a disir iso a min, espéroche á saída do pleno e douche unhas hostias”.

Este é o talante pseudodemocrático dunha persoa que é representante público e que ante a falta de argumentos, só pode ofrecer a forza bruta para ameazar e intentar intimidar a quen pensa diferente.
Desde o BNG denunciamos e reprobamos esta actitude, pois non se pode ameazar nin intimidar a ningunha persoa por pensar diferente. Desde o BNG expresamos o noso apoio ao compañeiro do BNG Luís Pérez porque en ningún momento lle faltou o respecto a ninguén e quen o coñece sabe da súa boa educación e do seu trato correcto.

- Outros asuntos:
- Proposta do BNG para que se realice unha beirarrúa na estrada da Graña ao seu paso por Carreira.
- Proposta do BNG instar a un propietario a poder unha árbore que invade parte dunha beirarrúa nas Abesadas.
- Proposta do BNG para adecuar a praza do monumento a Adeje.
- Corrección de varios erros detectados no Orzamento de 2017. Aprobado por unanimidade
- Devolución da fianza a Xesús María Lixó Axeitos polo contrato de mantemento do alumeado público. Aprobado por unanimidade
- Licitación para a concesión de varios postos no mercado municipal. Aprobado por unanimidade
- Arranxo da rúa Agustín Fernández Oujo. Tamén se tivo en conta unha emenda do BNG a esta iniciativa para crear un aparcadoiro gratuíto nunha finca desta rúa. Aprobado por unanimidade
- Apoio á Plataforma Vítimas do Alvia 04155 e instar ao goberno do Estado a que se abra unha comisión de investigación sobre o sinistro para depurar responsabilidades políticas. Aprobado por unanimidade
- Cesión dunha parcela a Cruz Vermella para que se poida empregar para cultivos. Aprobado por unanimidade
- Canalización e mellora no firme do camiño da Muralla en Aguiño. Aprobado por unanimidade
- Deuse conta tamén da situación sobre os cheiros que afectan á veciñanza de Castiñeiras. Esa información pode consultarse aquí.

O BNG logra un concello máis transparente, nun pleno no que aproba todas as iniciativas

O BNG coa Revolução dos Cravos- Rexistro e regulamento sobre agasallos e doazóns: “Os veciños e veciñas do Concello de Ribeira deben ter nos seus cargos públicos e nas administracións públicas un espello de responsabilidade, austeridade e honestidade” segundo o voceiro do BNG, Xosé Vázquez Cobas. Tendo como base estes principios estamos seguros e seguras de que se reforzará a confianza na integridade, obxectividade e imparcialidade das institucións públicas. Desde o BNG seguimos traballando na mellora da transparencia e cremos que a veciñanza debe coñecer que doazóns recibe o concello por seren propiedade de toda a veciñanza do municipio. A creación dun rexistro público suporá mellorar a transparencia e a loita contra posíbeis casos de corrupción. Cremos que debe existir un maior control e transparencia tamén sobre os agasallos que reciben os concelleiros e concelleiras. Esta transparencia e control será un xermolo para evitar suspicacias e xerará maior seguridade na custodia daqueles que, polas súas características, pasen a formar parte do patrimonio municipal. Do mesmo xeito contribuirá a evitar “perdas” de patrimonio público como a do traxe de gala tradicional galego que fora doado ao concello sen que se coñeza o seu paradoiro.

O BNG conseguiu o apoio unánime da Corporación Municipal para elaborar un regulamento de agasallos e doazóns, así como facer un rexistro público e accesíbel na web municipal.

- Paso seguro para a senda fluvial do río Artes: O paseo do río Artes discorre por un longo treito entre as parroquias de Artes e Oleiros, nesta última parroquia no lugar da Gándara o paseo interrómpese pola estrada AC-550. Neste punto non existen beirarrúas nin paso de peóns habilitado para atravesar a estrada que ten un elevado tránsito de vehículos a unha limitación de velocidade considerábel (70km/h). Se os e as camiñantes que van polo paseo dirección Oleiros desexan atravesar a estrada atópanse que deben discorrer por ela uns cantos metros en dirección Ribeira para poder salvar a varanda de protección.

O paso fluvial neste punto tamén carece de sinais adecuados cos que informar ás persoas camiñantes por onde deben continuar o seu camiño ben sexa dirección Artes, ben sexa dirección Oleiros.
Segundo o edil, Luís Pérez Barral ” é
 imprescindíbel dotar de beirarrúas neste treito ante o perigo que presenta para os peóns camiñar por unha estrada na que se pode circular a unha elevada velocidade”.

O BNG acadou o apoio unánime para facer 2 pasos soterrados no paseo fluvial do río Artes coas que mellorar a seguridade viaria e tamén mellorar a accesibilidade do paseo, cun novo firme.

Estación de Cangas, modelo que o BNG propón imitar. Foto: Faro de Vigo- Proposta sobre a construción dunha estación de autobuses: a raíz dunha moción (c’s) debatida na sesión plenaria, o BNG fixo a súa valoración e entende que en Ribeira é preciso mellorar o transporte colectivo e as infraestruturas relacionadas el, débese vertebrar o municipio e facilitar a comunicación entre parroquias para reducir o uso do vehículo particular. Foi o BNG o primeiro partido en solicitar a construción dunha estación de autobuses na época en que o noso benquerido compañeiro Plácido Betanzos era voceiro municipal. Tras máis de dúas décadas o PP foi incapaz de facer unha estación, demostrando a súa falla de modelo e de planificación da cidade, o modelo do PP é facer crecer a cidade sen servizos e infraestruturas públicas acordes á poboación.

O BNG propón unha estación intermodal para Ribeira, que contemple unifique o uso do transporte por estrada de autobuses e un futuro transporte marítimo que comunique a comarca da Barbanza coa outra beira da ría de Arousa, semellante ao modelo doutras vilas como Cangas do Morrazo.
O goberno comprometeuse a facer realidade esta decisión e contémplanse ubicala na zona que actualmente ocupan os redeiros nas Carolinas ou ben na zona portuaria diante do Mercado Muncipal.
Esta proposta foi aprobada por unanimidade

Outras temas:

- Mellora do acceso ao Hospital e aumentar os estacionamentos. Aprobado por unanimidade
- Celebrar o centenario das Irmandades da Fala. Aprobado por unanimidade
- Aumentar a limpeza do local de ensaio. Aprobado por unanimidade
- Melloras no barrio de Churriana. Aprobado por unanimidade
- Modificación da Ordenanza do Viveiro de Empresas para que ocupen esta instalación empresas consitutuídas de non máis de 24 meses. Aprobado por unanimidade
- Aumentar a limpeza do barrio do Cochón.
- Traslado duns contedores na Av. da Coruña para mellorar a visibilidade
- Dar conta á Deputación da Coruña para que pinte a estrada Carreira-Xarás

Lembra que podes consultar todas estas iniciativas ao completo no apartado de “transparencia” da nosa web.