Arquivo da categoría: Parroquias

Aprobadas todas as iniciativas do BNG en materia de saneamento e a creación dun aparcadoiro gratuíto

Resumo do pleno de xullo de 2017:

- Aprobada a proposta do BNG para crear un aparcadoiro gratuíto no contorno das Carolinas-Coroso: o Bloque presentou esta proposta ante a falta de aparcadoiros e tras falar con comerciantes e veciñanza da zona. Ante os numerosos establecementos comerciais abertos na Avenida da Coruña, existe unha demanda de zonas de estacionamento onde deixar os vehículos mentres se realizan as actividades comerciais.
En opinión do BNG e das persoas que rexentan negocios nesta zona o número de prazas habilitadas para estacionar é moi escaso. Alén disto último, debemos ter en conta que a maioría das edificacións do contorno son antigas e carecen de aparcadoiros o que provoca que moitas veciñas e veciños teñan que deixar o coche na rúa.
Tal e como defendeu o concelleiro Luís Pérez, no BNG cremos que unha posibilidade para darlle solución a este problema sería habilitar como zona de aparcadoiro gratuíto algunha parcela preto da avenida da Coruña ou rúa Sidreiras. A parcela debería ser acondicionada firme, iluminación, árbores, sumidoiros para este fin. A creación deste aparcadoiro beneficiaría a toda a veciñanza, establecementos comerciais da zona e serviría para que nos meses de verán as persoas que se achegan até a praia de Coroso poida atopar de maneira sinxela un lugar onde deixar o coche.

Aprobado por unanimidade
Proposta completa

- Proposta do BNG para demandar incrementos na partida orzamentaria destinada a camiños rurais: o concelleiro Antón Parada defendeu a necesidade de que Galiza e Ribeira teñan os camiños rurais en bo estado de conservación, non só para previr os lumes forestais, senón tamén para manter un rural vivo e con futuro. O concelleiro nacionalista expuxo que o Plan marco de mellora de camiños rurais para 2016, que contaba cunha dotación para un ano de 19.998.100 de euros, redúcense os fondos dispoñíbeis en máis dun 60 por 100. A Consellaría do Medio Rural recorta a asignación indicativa de 13 euros por habitante de 2016, ao pasar agora a 10 euros por habitante para o período bianual, isto é, 5 euros por habitante e ano.

Aprobado cos votos a favor do BNG, PSOE, IPR, C’s, 3 edís non adscritas/os e a abstención do PP
Proposta completa

- Aprobadas 17 actuacións por valor de 674.000€, moitas delas a petición do BNG:

- Pozo de bombeo e saneamento nos Mosqueiros 55.056€ proposta polo BNG.
- Pavimentación do camiño de Pereiras e do acceso ao Hospital da Barbanza 36.226€ proposta polo BNG
- Lastrar o exterior do Centro Social de Oleiros 56.568€ proposta polo BNG – Renovación servizos en Parte ao Río 38.947€ proposta polo BNG
- Pavimentación e instalación de pluviais na rúa Vicente Risco 23.975€
- Pavimentación, saneamento e pluviais en Martín 68.304€
- Pavimentación de camiños en Deán Grande 54.910€
- Pavimentación e servizos na rúa Martín Códax 40.078€
- Pavimentación no lugar das Laxes, Vilar e Frións 56.321€
- Instalación de pluviais en Fafián 43.347€
- Instalación de pluviais na Revolta 13.517€
- Renovación de abastecemento na rúa Sálvora 56.463€
- Saneamento en Pedra do Pino 20.190€
- Pavimentación rúa da Muralla e Luís Pimentel 27.680€ł
- Ampliación saneamento rúa do Porto 17.720€
- Renovación praza Rafael Dieste 45.842€
- Adquisición do sistema de control de estacionamentos para policía local 19.223€

Outros asuntos:

- Aprobado cos votos a favor de BNG, PP, PSOE, IPR, C’S, 2 edís non adscritos e 1 voto en contra dunha edil non adscrita, a creación dunha oficina de Rehabilitación Municipal a partir de 2018.
- Aprobado solicitarlle a Portos de Galiza que realice melloras no porto de Corrubedo. Nesta proposta, aprobouse unha emenda do BNG para reclamarlle que non só sexa unha actuación puntual, senón que haxa un mantemento anual. – Aceptación da cesión da estatua Grip, valorada entre 400.000 e 500.000€, por parte de D. Chipperfield para instalar en Corrubedo. A proposta do goberno era aceptar a cesión por 10 anos, mais finalmente aprobouse a proposta do BNG de ampliar a cesión a 20 anos con posibilidade de prórroga por 10 máis. Aprobado cos votos a favor de BNG, PP, PSOE, IPR, C’s e en contra de 3 edís non adscritas/os.
- Subvención nominativa de 2.650€ á Federación Galega de Atletismo para a celebración dun Medio Maratón en Ribeira. Aprobado por unanimidade
- Adxudicacións dun posto na primeira planta e do restaurante-terraza do Mercado Municipal. Aprobado por unanimidade
- Traspaso de Costas para titularidade municipal o terreo do parque do castro en Castiñeiras. O BNG pediu que todas as obras que se realicen no lugar, teñan un control arqueolóxico ante posíbeis achados. Aprobado por unanimidade
- Mellorar a planificación da Feira do Libro a partir de 2018. Aprobado por unanimidade
- Aprobado por unanimidade demandar a limpeza á persoa propietaria dunha leira en Ribeira e mellora dun camiño en Aguiño.
- Solicitude do BNG para facer un muro de contención por afundimento da estrada na Fontenla en Carreira.
- Solicitude do BNG para pavimentar o tramo que dá acceso ao parque de Parteaorío en Carreira.
- Melloras integrais no complexo polideportivo da Fieitiera e na limpeza de sumidoiros.
- O Concello de Ribeira negociará coas persoas propietarias de terreos dos Túneles e Pedra do Home para pór en valor a zona. Aprobouse cos votos a favor do PP, PSOE, IPR, C’s, abstención de 3 edís non adscritas/os e en contra do BNG. Desde o Bloque estabamos a favor da proposta pero non se permitiu votar por puntos e a iniciativa contemplaba contratar brigadas municipais contra os lumes forestais, un modelo que o BNG non promove. No Bloque apostamos por un equipo unificado desde a Xunta e con mando único, con persoal profesional e con boas condicións de traballo, o mesmo que reclaman os traballadores/as dos servizos de extinción
- Toma posesión José M. Cardalda como concelleiro de C’s

A veciñanza de Palmeira recolle sinaturas contra a instalación dunha antena

As veciñas e veciños de Palmeira compareceron en rolda de prensa para explicar a inquedanza que existe na parroquia polo emprazamento no que se pretende instalar unha antena de telefonía, preto do campo de fútbol e das vivendas.

Na mencionada zona xa existe outra antena, mais a que se pretende instalar agora vai ser moito máis potente e non se está tendo en conta a opinión da veciñanza para a súa colocación. Tanto as veciñas e veciños de Palmeira como o BNG consideramos que pode situarse nun lugar máis afastado e reducir as radiacións electromagnéticas que poden prexudicar a saúde.

Sobre a repercusión das ondas que desprenden os emisores de telefonía móbil, tal e como explicou o voceiro do BNG Xosé Vázquez Cobas, a Organización Mundial da Saúde (OMS) adoptou o denominado principio de precaución e recomenda unha política de xestión de riscos aplicada en circunstancias cun grao de incerteza científica, o que representa a necesidade de emprender accións para un risco potencialmente grave sen necesidade de agardar os resultados das investigacións científicas.

Vázquez Cobas indicou que o Bloque apoia a reivindicación e demandas da veciñanza que xa está recollendo sinaturas para evitar que a antena se instale nese emprazamento. Do mesmo xeito considera indecente que o goberno municipal non defenda os intereses da veciñanza e se posicione do lado da empresa. 

Por outra banda, parece que pode haber conflito de intereses xa que o concelleiro de Participación Cidadá e tenente alcalde Emilio Outeiral, tamén é presidente da Sociedade Fillos de Palmeira, onde xa fixo unha reunión para alugar o terreo para poder instalar a antena sen que se explicitase para que era o alugueiro da finca na orde do día enviada ás persoas socias. Ademais do anterior, o goberno local non se compromete a retirar a outra antena unha vez se instale a nova moito máis potente que a anterior, polo que habería dúas antenas.

O BNG propón 10 actuacións onde destinar o remanente de tesouraría de Ribeira

O BNG de Ribeira considera que o remanente de tesouraría debe ser investido en dar continuidade ás políticas que foron propostas polo Bloque Nacionalista Galego co fin de que o noso concello avance un paso máis. Queremos que se rematen as obras que tiveron asignación no orzamento do 2017 para a primeira fase, mais que precisan continuidade, moitas delas tendo o consenso do resto dos grupos municipais.

Semipeonalización da rúa Rosalía de Castro e rúa de Lugo.
Suporía dar continuidade as políticas de accesibilidade e mobilidade sustentábel así coma a potenciación do comercio local, xa que o aumento do espazo para peóns permitiría un maior tránsito de persoas por estas zonas.

Remate da obra de remodelación integral do Centro Social de Corrubedo.
Consideramos que é unha necesidade para a veciñanza desta parroquia ter a súa disposición un centro social en condicións do que carecen na actualidade.

Rematar a segunda fase das obras de Partealrío, acceso ao parque infantil na parroquia de Carreira.

Recebado do muro do campo de fútbol de Carreira.

Construción dun muro de contención no lugar de Fontenla na pista que vai á Filgueira en Carreira.

Nas Rebaleiras en Palmeira, habilitar o aceso dos vehículos a todas as casas, pois, coa obra xa aprobada algunha non o terá. Como xa temos manifestado moitas veces, son prioritarios para o BNG, os servizo os básicos, por iso consideramos que debe ser incluída.

Instalación da rede de saneamento, asfaltado e renovación das beirarrúas no lugar de Iñeiras (Olveira).

Mellora do firme e das beirarrúas da estrada que vai dende a capela das Dores ata a igrexa da Santa María de Olveira.

Mellora do firme e canalización de augas pluviais na estrada que vai dende o lugar de Salmón ata o Hospital do Barbanza.

Aparcamento público nas Carolinas xa que este polo da cidade carece un espazo deste tipo que axudaría a desconxestionar o tráfico na zona.

Aprobada por unanimidade a proposta do BNG para trasladar o aliviadoiro de Areeiros

Resumo do pleno do 26 de xuño de 2017

- Proposta do BNG para trasladar de localización o aliviadoiro do tanque de tormenta de Areeiros: O Concello de Ribeira vén de pór en funcionamento o sistema de depuración de augas residuais, tras pasar décadas carentes de depuración dos residuos urbanos. Esta importante obra de máis de 16 millóns de euros, está producindo molestias á veciñanza de varias zonas do municipio como poden ser a dos lugares do Touro, Castiñeiras e Areeiros. Este grave problema debe ser solucionado coa máxima dilixencia co fin de evitar molestias, desde o BNG seguiremos traballando como fixemos, desde o momento un, para que se cumpran coas garantías de depuración sen causar problemas na veciñanza. Ademais disto que, repetimos, debe ser solucionado coa máxima celeridade e garantías para que as ninguén teña que soportar cheiros na súa vivenda, existe outro que non deixa de ser menos grave como é a localización do aliviadoiro de Areeiros.

O sistema de depuración de augas residuais, está formado por unha serie de tanques de tormenta que almacenan a auga en casos de copiosas chuvias ou dun aumento do caudal de residuos que se envían á Estación de Depuración Augas Residuais (EDAR). Cada un destes tanques conta con cadanseu aliviadoiro para expulsar, en caso de necesidade, o líquido que non poida albergar no seu interior.

No caso dos Areeiros o aliviadoiro non desemboca no mar, faino no río Listres (popularmente coñecido tamén como río Paxariños). Unha das características deste río é que leva moi pouca corrente, mesmo en determinadas épocas do ano case non leva auga ou chega a secar nos meses de máximas temperaturas. Esta circunstancia fai que, de se producir unha vertedura polo aliviadoiro durante un destes períodos, os residuos quedarían estancadas no rego fluvial e non irían parar ao mar. No caso de que se chegara a aliviar durante algunha época na que o río ten auga, habería que superar outro problema; a nivelación do terreo pois o río en innumerábeis ocasións non ten saída ao mar por atoparse a praia a un nivel superior que a canle fluvial.

Outro dos motivos polos que queremos que se poida canalizar o aliviadoiro até o mar, ten haber co impacto e problema ambiental que se ocasiona, pois de ter que aliviar, non é o mesmo facelo nun río que ten pouco caudal que facelo no mar onde o problema ambiental causado sería moito menor. Ademais queremos que se canalice en condicións e que non afecte aos bancos marisqueiros pois deles dependen moitos postos de traballo.

É por todo isto que, en nome do Bloque Nacionalista Galego, o concelleiro Luís Pérez Barral solicitará dos membros da Corporación Municipal a aprobación seguinte acordo:

A) Que o Concello de Ribeira lle demande a Costas do Estado e Xunta de Galiza o permiso para que se poida realizar a canalización do aliviadoiro dos Areeiros até a zona de dominio marítimo-terrestre.
B) Enviar o presente acordo plenario a Costas do Estado.

- Outros asuntos:

- Solicitude do BNG para revisar e certificar o correcto cumprimento do contrato de limpeza de instalacións municipais por parte da empresa. Esta petición vén motivada ante a denuncia que trasladaron ao BNG de supostas faltas no cumprimento das condicións do contrato.
- Pregunta do BNG para saber se algunha empresa de telefonía solicitou permiso para instalar unha antena-repetidor en Palmeira. A veciñanza oponse á pretensión que existe de instalar unha antena preto das vivendas e a carón do campo de fútbol.
-Recoñecemento extraxudicial de creto, isto é pago de facturas de 524.102€ co informe en contra do servizo de intervención. O goberno destina estes cartos a imprevistos en diversas obras, o que amosa unha clara falta de previsión e unha mala xestión dos fondos públicos cando hai escaso tempo se aprobou o Orzamento de 2017. Desde o BNG cremos que isto se debe evitar e debemos facer unha boa planificación e xestión dos fondos públicos. A pesar disto aprobouse cos votos a favor de PP, IPR e 2 edís non adscritas, abstención dun edil non adscrito e voto en contra do BNG e PSOE
- Aprobación bases reguladoras do programa vivendas baleiras. É un convenio de colaboración coa Consellaría de Vivenda e Solo para intentar poñer en uso todas as vivendas baleiras que ten o noso municipio, unhas 3.000. Aprobado por unanimidade
- Renuncia do concelleiro de C’s Juan J. Chouza
- Transferencia de creto. Aumento de 40.000€ a clubes deportivos pasando de 80.000€ a 120.000€, 20.000€ nun convenio de colaboración co FEUGA para ter bolseiras/os universitarias/os en prácticas e 12.000€ de axuda para a confraría de Aguiño para a celebración da Festa do Percebe. Aprobado por unanimidade.
- Modificación da ordenanza reguladora de venda ambulante para que os permisos teñan unha duración de 5 anos no canto dun ano. Aprobado cos votos a favor de BNG, PP, IPR, 3 edís non adscritas/os e abstención do PSOE.
- Aprobado por unanimidade a convocatoria do Consello de Seguridade Local para analizar o aumento da delincuencia.
- Ampliación da beirarrúa nun tramo da rúa Fr. Lorenzo Mariño en Aguiño. Aprobado por unanimidade
- Limpeza do río Listres. Aprobado por unanimidade – Retirada duns postes na rua Luís Pimentel en Aguiño
- Arranxo do parque Rafael Diste. Aprobado por unanimidade

O BNG levará as demandas dos mariñeiros de Corrubedo ao Parlamento Galego

O concelleiro nacionalista Antón Parada estivo en Corrubedo para atender as demandas dos mariñeiros de Corrubedo en relación ás deficiencias que presenta instalación portuaria.

Os mariñeiros de Corrubedo trasladáronlle ao representante do BNG a falta de chabolas para poderen traballar baixo cuberto e non baixo as inclemencias do tempo.
Reiteraron as demandas, que o BNG xa trasladara o ano pasado ao goberno municipal e a Portos de Galiza, como a necesidade de reparar as escaleiras, sinalización viaria para evitar que os vehículos aparquen diante da rampla, o rebaixe da rampla no seu tramo final para evitar que as embarcacións encallen así como aumentar e mellorar o alumeado.

Ante este problema de total esquecemento por parte de Portos e o goberno local, Parada Fernández anuncioulles que estes problemas alén de ser levados novamente ao pleno do Concello de Ribeira, serán trasladados ao Parlamento de Galiza para que a deputada nacionalista encargada de asuntos marítimos Montse Prado interpele ao responsábel de Portos de Galiza esixíndolle expliacións sobre o abandono do Porto de Corrubedo así como habilitar partidas orzamentarias para o seu arranxo e mellora.

Iniciativa presentada en 2013 polo BNG: veciñanza de Corrubedo e BNG denuncian o mal estado da zona portuaria