Queremos Galego Barbanza convoca unha caravana de automóbiles como acto reivindicativo a prol do idioma

Milleiros de persoas concentradas a prol do idioma no Obradoiro o pasado 30 de decembro

O idioma é a chave
coa que abrimos o mundo,
o salouco máis feble
o pesar máis profundo.
Manuel María

A Plataforma Queremos Galego da Barbanza convócanos, a toda a cidadanía da Barbanza, a participar nunha caravana de automóbiles reivindicativa o vindeiro sábado, 2 de xaneiro, a partir das 18:00 horas. Sairá do Porto de Rianxo e rematará cunha concentración diante do palco da musica, na Avenida do Malecón de Ribeira

Este acto enmarcase dentro dos que a Plataforma Queremos Galego ten previsto celebrar por todo o País en sinal de rexeitamento á aprobación do novo decreto do galego no ensino no que, por primeira vez na historia da nosa autonomía, se lexisla en contra do idioma propio de Galiza. Neste caso reducindo a súa presenza no ensino, do 50% ao 33%.

Programa:

Rianxo: saída ás 18:00 horas do Porto de Rianxo, diante da confraría, darase unha volta polo casco de Rianxo e sairase cara a Boiro pola AC-305.

Boiro: está prevista a chegada ás 18:30 horas, darase unha volta pola casco urbano para sair até A Pobra.

Pobra: chegarase un pouco antes das 19:00 horas, darase tamén unha volta pola vila e logo sairase cara Ribeira.

Ribeira: está prevista a chegada a capital da Barbanza sobre as 19:30 horas. Despois de dar unha volta polo casco urbano rematarase ao final do Malecón. Logo de aparcar farase unha concentración a carón do palco da música do Paseo do Malecón, onde se dará lectura ao manifesto feito pola plataforma Queremos Galego ao redor das 20:00 horas.

Podes participar na caravana dende o seu inicio en Rianxo, incorporándote no transcurso do traxecto ou na concentración final en Ribeira.

One Comment on “
Queremos Galego Barbanza convoca unha caravana de automóbiles como acto reivindicativo a prol do idioma

  1. Pingback: chuza.org

Deixa unha resposta

O teu enderezo electrónico non se publicará Os campos obrigatorios están marcados con *