Reclamamos melloras no servizo de transporte sanitario non urxente na Barbanza

O BNG presentou unha iniciativa parlamentar para reclamar que se adopten as medidas necesarias para garantir a cobertura da demanda existente na comarca da Barbanza de transporte sanitario non urxente, apostando pola prestación pública deste servizo

As deputadas do BNG, Ana Pontón e Ana Luísa Bouza, veñen de presentar unha Proposición non de lei no Parlamento Galego para frear un novo recorte nos servizos públicos que dende a chegada do PP á Xunta de Galiza se están a producir en todo o país e tamén na comarca da Barbanza. Neste caso, trátase da limitación ao acceso ao transporte sanitario non urxente, según denunciaron os propios pacientes.

Según indican as deputadas na súa iniciativa, “a consecuencia directa desta decisión é a anulación de consultas e problemas na xestión das urxencias e traslados ao Hospital Clínico.” Consideran que a Consellaría de Sanidade actúa de xeito irresponsábel dificultando o acceso a un servizo básico como é o do transporte sanitario e, polo tanto, prexudicando a moitas persoas que teñen problemas de mobilidade, que ven restrinxido un servizo do que antes dispoñían.

As parlamentarias do BNG consideran preocupante esta actitude da Xunta de Galiza pois constitúe un paso máis no deterioro dos servizos públicos. Máis alarmante, se cabe, que a resposta da Consellaría de Sanidade sexa que se “está traballando para mellorar este servizo”, evidenciando unha singular concepción de como se melloran os servizos públicos.

Iniciativa Parlamentar:
2009-10-14-servizo-transporte-sanitario-non-urxente-barbanza.pdf

Deixa unha resposta

O teu enderezo electrónico non se publicará Os campos obrigatorios están marcados con *