Apostamos por unha depuradora para o polígono de Xarás

2007-10-25 2ª entrevista co Conselleiro Medio Ambiente

O pasado xoves, día 25 de outubro, recibiunos o Conselleiro de Medio Ambiente, Manuel Vázquez, á portavoz do BNG, Dominga Brión, ó alcalde e ás distintas voceiras municipais, agás ó voceiro do PSOE, que non asistiu. Na xuntanza tamén estiveron presentes os directores xerais de Augas de Galiza, e Conservación da Natureza, así como o delegado provincial de Medio Ambiente na Coruña.

Na anterior reunión que mantivemos co Conselleiro o 13 de xullo, comprometérase a reunirse de novo coa delegación ribeirense na primeira quincena de setembro, despois de estudar o cambio de ubicación da depuradora, de Pinisqueira a carón de Conresa, en Couso, así como o resto de alegacións presentadas. A este retraso no cumprimento do seu compromiso hai que engadirlle que esta reunión veu precedida de distintas declaracións na prensa que xa nos facían albiscar a falta de compromiso político do PSOE cun saneamento racional do noso Concello.

Durante a reunión, que se prolongou por máis dunha hora, a portavoz do BNG, Dominga Brión, fixo referencia ao acordo plenario unánime da Corporación Municipal de 30 de xullo, insistindo na necesidade dunha depuradora específica para a depuración das augas residuais do polígono de Xarás, lembrando que no anteproxecto da EDAR que elaborou a Consellaría, a carga residual industrial representa o 50% da carga contaminante que a depuradora terá que tratar.

A pesar de que tanto a veciñanza como todos os Grupos Municipais fomos capaces de chegar a este acordo plenario de mínimos, ao único ao que se comprometeu o Conselleiro de Medio Ambiente é a estudar outra posíbel ubicación para a EDAR, antes de chegar a Conresa á dereita, ao non considerar idónea a proposta feita na anterior reunión.

Cabe lembrar que aínda que a Consellaría di que non contemplan a construción dunha depuradora para o Polígono de Xarás, na práctica si lla vai a facer en Couso, xa que ten que facer unha depuradora o dobre de grande; a isto haberá que engadirlle os problemas que vai a traer o traslado desta carga contaminante até alí e mesmo a súa depuración conxunta coas augas residuais urbanas. Para máis, a cidadanía no seu conxunto teremos que financiar os custos da depuración dunha contaminación procedente da actividade empresarial, en contra do principio de “quen contamina paga”, que hoxe está a guiar toda a política de responsabilidade ambiental.

Dende o BNG de Ribeira consideramos que despois de tantos anos demandando o saneamento integral do noso Concello, os e as ribeirenses no seu conxunto temos dereito ao mellor saneamento posíbel. Aínda tendo en conta o esforzo económico que vai a facer a Consellería de Medio Ambiente (23 millóns de € só na construción da EDAR), consideramos que o anteproxecto que presenta, a proposta do Goberno do PP de Ribeira, é mellorábel. Agardamos, pois, que dende esta Consellaría de responsabilidade do PSOE teñan en consideración tanto as alegacións presentadas, como a mobilización social que este anteproxecto está a xerar, así como o acordo plenario de mínimos acadado pola Corporación Municipal do 30 de xullo, a iniciativa do BNG de Ribeira, recollendo a proposta veciñal.

Máis información:
Reunión co Conselleiro de Medio Ambiente o 13 de xullo
Acordo Plenario da Corporación Municipal de 30 de xullo
No apartado “Temas” en “EDAR Ribeira” atoparás máis información

Nova na Voz:
Medio Ambiente descarta construír unha depuradora para o polígono de Xarás

Artigo en Vieiros:
Aguiño: Contra Goliath

One Comment on “Apostamos por unha depuradora para o polígono de Xarás”

  1. Vaia, vaia!! O do SOE non asistiu… Será que xa sabia o que ía a decir Pachi? Como se vos vé o plumeiro! E digo eu. se en vez de falar do saneamento de Ribeira estiveramos falando do do Carballiño, Pachi, tamén farías o mesmo?

Deixa unha resposta

O teu enderezo electrónico non se publicará Os campos obrigatorios están marcados con *