O BNG da Barbanza rexeita as piscifactorías no LIC de Corrubedo

Reserva de 55.000 m. terreo para unha piscifactoría en Couso Reserva 308.000 m. terreo piscifactoría do Corgo Reserva de 115.000 m. terreo para ampliar piscifactoría Seráns

A Asemblea Comarcal do BNG da Barbanza aprobou por unanimidade unha resolución pola que quere mostrar o seu rexeitamento aos proxectos que o Plan Acuícola Galego ten previsto para a nosa comarca e amosar o seu apoio e sumarse á convocatoria de manifestación que se celebrará o vindeiro domingo, día 4 de novembro, ás 12 horas, no porto de Corrubedo.

Ao mesmo tempo animamos á cidadanía da comarca a participar na manifestación, convocada por diversos colectivos medioambientais.

Máis información sobre a manifestación:
Marcha nacional contra o Plano Acuícola. Corrubedo 4-N, 12h

Resolución da Asemblea Comarcal do BNG da Barbanza

A asemblea comarcal do BNG da Barbanza, reunida o pasado sábado 20 de outubro do 2007 no concello de Boiro, acordou tomar a seguinte resolución:

O BNG da Barbanza quere mostrar o seu apoio, e sumarse, á convocatoria de manifestación prevista para o vindeiro día 4 de novembro no porto de Corrubedo, mostrando o seu rexeitamento aos proxectos que o Plan Acuícola Galego ten previsto para a nosa comarca. Non é de recibo que se poda por en perigo a fonte de riqueza que durante moito tempo foi quen de sustentar a economía de moitas familias, e base primordial da productividade da comarca.

Calquera nova actividade ten que ser respectuosa coas que, tradicionalmente, permitiron o sustento da nosa comarca, nomeadamente a pesca, o marisqueo e o sector mexilloeiro. Ao mesmo tempo, dende unha perspectiva medio ambiental non son nin os lugares máis adecuados para a colocación destas plantas, nin as dimensións máis acaídas para os entornos dos que falamos. Por todo isto, animamos á cidadanía da comarca a participar na manifestación que diversos colectivos medioambientais teñen convocado para o domingo 4 de novembro no porto de Corrubedo, agardando que serva para que a Consellería de Pesca reflexione e se sente a negociar cos sectores implicados o deseño do Plan Acuícola Galego.

A Barbanza a 20 de outubro do 2007.

Asemblea Comarcal do BNG da Barbanza.

2 Comments on “O BNG da Barbanza rexeita as piscifactorías no LIC de Corrubedo”

Deixa unha resposta

O teu enderezo electrónico non se publicará Os campos obrigatorios están marcados con *