Ribeira beneficiarase do Plan de Mellora da Calidade de Subministración Eléctrica

Fernando Blanco en Ribeira

RIBEIRA ENTRE OS CONCELLOS QUE SE BENEFICIARAN DO PLAN DE MELLORA DA CALIDADE DA SUBMINISTRACIÓN ELÉCTRICA DESENVOLVIDO POR INNOVACIÓN E INDUSTRIA E AS COMPAÑÍAS ELÉCTRICAS

Fernando Blanco asinou onte, día 2 de xullo, un convenio de colaboración con Unión Fenosa, BEGASA e APYDE para a mellora das infraestruturas eléctricas no trienio 2007-2009

O conselleiro de Innovación e Industria, Fernando Blanco; o vicepresidente de Unión Fenosa, Honorato López Isla; o presidente de Barras Eléctricas Galaico-Asturianas (BEGASA), Miguel Antoñanzas; e o presidente da Asociación de Produtores e Distribuidores de Enerxía de Galicia (APYDE), José Manuel Arufe, asinaron onte en Santiago un convenio de colaboración para a mellora da calidade da subministración eléctrica de Galiza no trienio 2007-2009.

Este convenio –enmarcado no Plan de Mellora da Calidade da Subministración Eléctrica da Estratexia Energos– vén a continuar o subscrito polo departamento autonómico e as tres distribuidoras eléctricas en 2006 e con el preténdese mellorar a subministración eléctrica naquelas zonas rurais aínda deficitarias, no marco de actuación da Consellaría para mellorar a calidade do subministro no conxunto do país. O investimento previsto no convenio para levar a cabo as obras de mellora nas infraestruturas eléctricas no período 2007-2009 ascende a 60 millóns de euros, dos que as empresas achegarán 33 e a Consellaría de Innovación e Industria os 27 restantes (o 45% do total). En total, beneficiaranse deste convenio máis de 255 concellos galegos, entre os que están tamén Boiro, Rianxo, Pobra e Porto do Son.

Segundo explicou Fernando Blanco, este convenio continúa o camiño iniciado en 2006, dá visión plurianual nos tres seguintes anos e pon de manifesto o compromiso claramente investidor que contempla a Estratexia Energos desenvolvida por Innovación e Industria, posto que estes 60 millóns veñen a sumarse aos 19,9 destinados en 2006, polo que o investimento total destinado á mellora da calidade da subministración ascende a 80 millóns no cuadrienio 2006-2009.

Máis información…
convenioelectricasmelloracalidade02-07-07.pdf

Deixa unha resposta

O teu enderezo electrónico non se publicará Os campos obrigatorios están marcados con *